काठमाडौं:
दक्षिण कोरियामा रोजगारीको सिलसिलामा रहेका युवा लेखक बसन्त बहादुर शाहीले आसन्न फागुन २१ गते हुने प्रतिनिधि सभा निर्वाचनलाई लक्षित गर्दै एक मार्मिक अपिल सार्वजनिक गरेका छन्।
उनले निर्वाचनलाई लोकतन्त्रको आधारस्तम्भ मान्दै नेपालमा भने निर्वाचन क्रमशः “धनतन्त्र” को चंगुलमा फस्दै गएको टिप्पणी गरेका छन्। शाहीले नेपाली मतदाताहरूलाई आफ्नो अमूल्य मत मासु, रक्सी, पेट्रोल वा केही हजार रुपैयाँमा साटफेर नगर्न आग्रह गरेका छन्।
“यदि हामीले आफ्नो विवेकलाई एक छाक मासु र एक बोतल रक्सीमा साट्यौं भने, त्यो मतको मात्र अपमान हुँदैन, राष्ट्रको भविष्यप्रतिको जिम्मेवारीमाथि पनि आघात पुग्छने” उनले उल्लेख गरेका छन्। उनका अनुसार भोट पैसा र मदिरामा किनबेच हुँदा निर्वाचित जनप्रतिनिधि जनसेवकभन्दा पनि लगानी असुल्ने मानसिकतामा पुग्ने खतरा रहन्छ। जसका कारण नीतिगत भ्रष्टाचार मौलाउँदै जान्छ र शिक्षा, स्वास्थ्य, रोजगारी तथा विकासका एजेण्डाहरू ओझेलमा पर्दछन्। शाहीले विशेषगरी सचेत युवा पुस्ता (Gen-Z) लाई सम्बोधन गर्दै अब धैर्यता समाप्त हुँदै गएको बताएका छन्। सामाजिक सञ्जालमा सीमित असन्तुष्टि अब मतदान केन्द्रमै अभिव्यक्त हुने संकेत गर्दै उनले राजनीतिक नेतृत्वलाई समयमै सुधार गर्न चेतावनी दिएका छन्।
“देश पहिलेको जस्तो अवस्थामा फर्किन सक्दैन। अबको आन्दोलन केही दिनको हल्ला होइन, दीर्घकालीन परिवर्तनको संकेत हुनेछ,” उनले भनेका छन्। विदेशमा बस्दै आएका शाहीले देशमै पर्याप्त रोजगारी सिर्जना नभएका कारण आफूजस्ता हजारौं युवाहरू खाडी मुलुक तथा अन्य देशमा नारकीय जीवन बिताउन बाध्य भएको पीडा व्यक्त गरेका छन्। “देश छाड्दाको पीडा र परिवारसँगको बिछोडको दुःख हामी विदेशिएका युवालाई मात्रै थाहा छ,” उनले भावुक हुँदै लेखेका छन्। उनले सिंगापुर र मलेसियाको उदाहरण दिँदै सक्षम नेतृत्वले चाह्यो भने देश परिवर्तन सम्भव रहेको दाबी गरेका छन्।
देश बनाउन नीतिगत सुधार र इमानदार नेतृत्व आवश्यक रहेको उनको भनाइ छ। उनले अहिले देशको नीति तथा कानून निर्माण गर्ने प्रतिनिधि सभा सदस्य चयन गर्ने महत्वपूर्ण घडी आएको उल्लेख गर्दै सबै नेपाली आमा-बुबा, दाजुभाइ तथा दिदीबहिनीहरूलाई सक्षम र राष्ट्रहितमा काम गर्न सक्ने नेतृत्व चयन गर्न आग्रह गरेका छन्। “भोट मासु र रक्सीमा होइन, नीतिर निर्माणमा दिइनुपर्छ।” अन्त्यमा, उनले एक मतले राष्ट्रको भविष्य निर्धारण गर्ने भएकाले विवेकपूर्ण निर्णय गर्न सबै मतदातालाई हार्दिक अपिल गरेका छन्।
प्रकाशित मिति : २०८२ फागुन १० गते आइतबार
प्रतिक्रिया दिनुहोस्