विप्लव र प्रचण्ड तयार भए कसैले चाहेर पनि माओवादी एकता रोकिदैनःभरत सी

२१ फागुन, कालिकोट ।

नेपाल कम्युनिष्ट पार्टीका स्थायी समिति सदस्य भरत सीले नेकपाका महासचिव विप्लव र माओवादी केन्द्रका अध्यक्ष प्रचण्ड तयार हुनेहो भने कसैले चाहेर पनि माओवादी एकता नरोकिने बताउनु भएको छ ।

नेपाल कम्युनिष्ट पार्टी रास्कोट नगर कमिटीले सहिद सप्ताहको अवसरमा रास्कोटको आरसीपी बजारमा बुधवार आयोजना गरेको सहिद परिवार तथा वेपत्ता परिवारको अभिनन्दन कार्यक्रमलाई सम्वोधन गर्दै स्थायी समिति सदस्य भरत सीले विप्लव र प्रचण्ड तयार हुनेहो भने कसैले चाहेर पनि माओवादी एकता नरोकिने बताउनु भएको हो । उहाँले कालिकोट जिल्ला माओवादी एकताको अग्रमोर्चा हुनुपर्नेमा कतिपय माओवादीहरु एकता विरोधी जस्तो देखिएको टिप्पणी गर्नु भयो । स्थायी समिति सदस्य भरतले भन्नु भयो ‘कालिकोटमा धेरै माओवादी विग्रिएका छैनन् । केही थोरै मान्छे विग्रिएका छन ।

तर ती अति विग्रिएका छन । तिनै माओवादी एकता विरोधी जस्तै देखिएका छन ।’ उहाँले कतिपय कालिकोटका माओवादीहरु रात दिन प्राथाना गरेर माओवादी एकता नहोस भन्ने तिर देखिएको टिप्पणी गर्नु भयो । ‘तर रात दिन प्राथाना गरेपनि माओवादी एकता विप्लव र प्रचण्डले चाहने हो भने कसैले चाहेर पनि रोकिदैन’ नेता भरत सीले भन्नु भयो । उहाँले माओवादीहरुको एकता भ्रष्टाचार दलाल पुँजीवादी व्यवस्थाको संरक्षणका लागि नभई समाजवादका लागि हुने बताउनु भयो । उहाँले देशमा दलाल पुँजीवादको समस्या मुख्य भएकाले यो व्यवस्थाबाट सहिदहरुको सपना कुनै पनि हालतमा पुरा नहुने बताउनु भयो ।

उहाँले भन्नु भयो, यहाँ दलाल पुँजीवादको समस्या छ, दलाल पुँजीवादी संविधान व्यवस्था हटाऔ भन्दा र भ्रष्ट एनसीएलमाथि कार्वाही गर्दा प्रतिबन्ध केपी प्रचण्डले लगाए । आज हामीले भनेकै ठाउँमा सबै पुगेका छन । हामीले कुनै माफी नै माग्ने काम गरेका छैनौ । माफी जनतालाई झुट्टा बोल्नेले माग्नु पर्छ । नेता भरतले जनयुद्ध र सहिद बेपत्ताहरुको लक्ष्य उद्देश्य पुरा नभएको जिकिर गर्दै सबैले एकीकृत जनक्रान्तिको बाटोबाट लक्ष्य उद्देश्यहरु पुरा गर्नुपर्ने भनाई राख्नु भयो । कार्यक्रममा स्थायी समिति सदस्य भरतले सहिद परिवारलाई दोसल्लाह ओढाएर सम्मान गर्दै दाँते ओखरका विरुवा हस्तान्तरण गर्नु भएको थियो ।

नेकपा उत्पादन क्रान्तिमा लागेकाले सहिद सप्ताहको अवसरमा सहिद परिवारलाई ओखरको विरुवा हस्तान्तरण गरेको नेकपाले बताएको छ । कार्यक्रममा नेकपाका जिल्ला इन्चार्ज विवेक सीले सहिदको सपना पुरा गर्ने सबै भन्दा वढी दायित्व सहिद परिवार को भएको बताउनु भयो । उहाँले सहिद परिवारले पार्टी र नेतालाई सहि सुझाव दिनु पर्ने बताउनु भयो । कार्यक्रममा युवा संगठन नेपालका केन्द्रीय अध्यक्ष दिनेश सीले सम्वोधन गर्दै जनयुद्धमा प्रचण्डले गरेको धोकाका कारण सहिदहरुको सपना पुरा नभएको बताउनु भयो । उहाँले माओवादी केन्द्र सत्तामा गएर महलमा पुगेको र नेकपाले जनताको क्रान्ति पुरा गर्ने कुरा उठाउदा प्रतिबन्ध लगाई जेल पठाएको टिप्पणी गर्नु भयो । नेकपाका केन्द्रीय सल्लाहकार समिति सदस्य समग्र सी र जनपत्रकार संगठन नेपालका केन्द्रीय सचिव वसन्त विकले सहिदहरुको सपना अझै पुरा नभएको धारणा राख्नु भयो ।

उहाँहरुले क्रान्ति छोड्ने र जनतालाई लुटनेहरुले माओवादी एकता विरोधी कुरा गरिरहेको दाबी गर्नु भयो । सहिद विमलको भाई नयाँ तिरुवा, सहिद कल्पनाको वुवा कालि वहादुर शाहीले माओवादीले झुट्टा बोल्न नहुने र जनतालाई भनेको काम गर्नु पर्ने सुझाव दिनु भयो । उहाँहरुले सहिदको सपना पुरा गर्न माओवादीहरुको रुपान्तरण सहित एकता गर्नुपर्ने पनि बताउनु भयो । नेकपा रास्कोट नगरकमिटीका इन्चार्ज निर्देशन सीको अध्यक्षतामा भएको कार्यक्रमको संचालन संजय सीले गर्नु भएको थियो ।