१६ चैत्र, काठमाडौ ।
विप्लव नेतृत्वको नेकपाले तीनकुनेमा भएको घटनाका अपराधिहरुलाई कडा कार्वाही गर्न सरकारसंग माग गरेको छ ।
नेकपाका महासचिव विप्लव सीले शनिवार एक प्रेश विज्ञप्ति जारी गर्दै तीनकुनेमा भएको घटनाका अपराधिहरुलाई कडा कार्वाही गर्न सरकारसंग माग गर्नु भएको हो ।
नेकपाले राजावादी – प्रतिगमनकारी तत्वहरुले शुक्रवार काठमाण्डौको तीनकुनेमा विरोध सभाको वहानामा भिड जम्मापारेर विध्वंस मच्चाउने कार्य गरेको भन्दै विध्वंसकारी कार्यको घोर भत्र्सना गरेको छ ।
नेकपाको जारी विज्ञप्तिमा भनिएको छ ‘विध्वंसका क्रममा नेकपा (एकीकृत समाजवाद) को केन्द्रीय कार्यालय, जिल्ला कार्यालय, नेकपा एसका अध्यक्ष तथा पूर्वप्रधानमन्त्री माधव कुमार नेपालको घर, भाटभटेनी सुपर मार्केट, कान्तिपुर, अन्नपूर्ण पत्रिका कार्यालयका साथै विभिन्न निजी घरहरुमा तोडफोड गर्ने, सवारीसाधनमा आगजनी गर्ने अति निन्दनीय, अराजक, ध्वंसात्मक कार्य गरे । हाम्रो पार्टी उक्त विध्वंसकारी कार्यको घोर भत्र्सना गर्दछ र अपराधिकहरुलाई कडा कारवाहीको माग गर्दछ ।’
नेकपाले गणतन्त्रको रक्षा तथा समाजवादी गणतन्त्रका पक्षमा समाजवादी मोर्चाको जनसभामा उपस्थित आम जनता एवं चारै पार्टीका नेता–कार्यकर्ताप्रति हार्दिक आभारसहित धन्यवाद ज्ञापन पनि गरेको छ ।
देशमा राजनीतिक अस्थिरता, आर्थिक संकट, भ्रष्टाचार, सांस्कृतिक विचलन, विदेशी हस्तक्षेप चरम अवस्थामा पुगेको बेला प्रतिगमनकारी हर्कतले फैलिने मौका पाएको नेकपाको निस्कर्ष छ ।
नेकपाले अहिलेको निकास प्रतिगमन हुनै नसक्ने, यथास्थितिमा गोलचक्कर लगाइ राख्ने दलाल पुँजीवादी प्रवृत्ति र संसदीय व्यवस्था पनि हुन नसक्ने जिकिर गरेको छ ।
नेकपाले विज्ञप्तिको अन्त्यमा अहिलेको निकास नेपाली विशेषताको समाजवाद या वैज्ञानिक समाजवादी व्यवस्थाको भएको उल्लेख गर्दै आम नेपाली परिवर्तनप्रेमी जनतालाई प्रतिगमनकारी एवं यथास्थितिवादी दलाल पुँजीवादका विरुद्ध संघर्ष गर्दै समाजवादतिर अगाडि बढ्न विशेष अपिल गरेको छ । विज्ञप्तिको पूर्णपाठ
